كبرا وكبرت اهتماماتهما الحياتية بتفاصيلها وحيثياتها.. وتباينت أيضا المسافات الجغرافية بينهما.. لكن ظل ما يجمعهما حاضرا وبقوة.. حب المدينة الزاخرة بالتراث والتاريخ بروح طفولية تأبى أن تكبر..
إنها حكاية طبيب وفنانة مسرحية..
تكشبيلة مراكشية دليلة حياوي الجزء 7
هو:
* انتي بوحدك وأنا بوحدي. ومن الصغر بيناتنا تفاهم كبير حتى صاحبتك تتقولها.
– وهذا في نظرك اكتشاف؟
* الاكتشاف هو اني بغيت نكمل حياتي معك. إذا قبلتي عليا.
– آهيااااوا
* أنا محتاج للحب ديالك.. الحنان ديالك.. كلامك الموزون والمؤدب
هي باستنكار:
– تخيّلتيني أنا ممكن نخرب حياة امرأة أخرى؟
* هاذ الشي عرفته منين رفضتي الخطبة ديال امرأة هذاك الوزير!
– إيوا؟ وفي نظرك رفضت خراب مغاربي…
هو مقاطعا:
* ما كانش خراب.. جاتك المرأة طالبة راغبة أصالة عن قبائل الحراثين ديالها وقبائل البيضان ديال راجلها وأنت رفضتي! ما تكونيش انتي السبب في سوء العلاقات ما بين البلدين!؟
– شفتك تتفصل لي تهمة الإضرار بالمصالح الوطنية العليا.. بغيت تسالي ليا حياتي وراء الشمس؟
* وجودك جنبي هو الحياة.
– يمكن ساكناك جنية اسمها حياة! وموحال طائفة گناوة عارفين ليها لون أو نوع بخور!.. آجي علاش ما تمشي للصويرة وتدير دردبة في ضريح سيدي بلال؟ واختار ليها شي لون ما دايرش! آش ظهر ليك في شرقراق؟ مغلوق ولا الجنجاري مفتوح؟!
* لواه قلب عدسة بزويوقات في الخابوري!
ـ الله! شحال توحشت قاموس الألوان المشتق من الطبيعة: البراية، الفجلي، الديدي، المسكي، الشمعي، العسلي، قلب بانانة، قلب قوقة، الخرشوفي، الشيبي، الفنيدي، الزبطي، الحجري، الفاري…
هو:
ـ حياتي نيت لونها حجري مخطط بالفاري!!.. آجي علاش ما نعوضو ما فات. وانا متيقن سعادتنا مع بعض في مدينتنا.
– الله يا ربي مولاي! واش تخبّى ليا في هاذ النهار! ياك خلّيت ليكم المدينة وما فيها؟.. اش باقي بغيتو عندي؟
* ما زال ما عييتيش من تحقيق الذات في الخارج؟
– باااااااركااااا
* مراكش عمرها ما نساتك ومثقفينها حتى هوما. وهذا هو تحقيق الذات.
– مالك تدخّل ليا شعبان في رمضان؟
* لواه بين الأعياد في العيد الكبير سمعيني! شحال هذي باش هجرتي الساحة الثقافية؟
– باركا
* ياك عشر سنين أو احد عشر عام؟
– باركا
* والله شهيد أن في گاع الأمسيات ديال النخبة تيتفكروك الناس.
– باركا
* ما تصوريش فرحة المثقفين منين داز النقل المباشر على الشاشة ديال المسرح وخا قدمتي العرض بلغة ما تيتكلموهاش.
– باركا
* وما نقوليكش على ليلة شاعر الحمراء والصبحية ديال الكلية. الذكرى ديالك حية.
– مولودة بسبع أرواح غير تهنى!
* بنت مدينة سبعة رجال .
– باركا
* مراكش مدينتك
– باركا
* اللي رضعاتك وكبراتك.
– باركا
* اللي أحبتك
– وفرطت فيا وأنا مجروحة! رخت فيا الفوك سمحت فيا
* مهما بنيتي وعلّيتي في الخارج راه بلاد البراني.
– يا ودي الرجوع لله! راه أنا البرانية في هذاك الخارج!
* انت برانية تمّا ومولات المَحال هنا!.. هنا بلاصتك.هناوأنا وراك وقدامك وفي جنبك هي ساخرة بمرارة:
– أنا يُمناك أنا يُسراك
سارع سارع أنت البارع الله يرحم بوكماخ!
* مراكش تتغني ليك:
رحمي يا راحة العقل تُرحمي ارجعي لمدينتك عاود تانيتعقلي منين كان تيعيطوا ليك فمراكش: مَي زيادة؟
– وااا باركا
* تعقلي شحال من حزب بغى يجرك لعندو لأن عندك متابعين باش ما نقولش أتباع؟
– دبا من هاذ الشي كلّو!.. اش بغيتي؟
* أنا محتاج ليك
– عمري تخليت عليك؟ وخّى ماشي لالة مولات العقل لكن تنحاول نسمعك ونفكر معك!
* مدينتك محتاجاك
– خررررج مراكش من الهذرة! حسابي معها بوحدو!
(يتبع)
