انت هنا : الرئيسية » اخبار متنوعة » تكشبيلة مراكشية 9

تكشبيلة مراكشية 9

كبرا وكبرت اهتماماتهما الحياتية بتفاصيلها وحيثياتها.. وتباينت أيضا المسافات الجغرافية بينهما.. لكن ظل ما يجمعهما حاضرا وبقوة.. حب المدينة الزاخرة بالتراث والتاريخ بروح طفولية تأبى أن تكبر..
إنها حكاية طبيب وفنانة مسرحية..

تكشبيلة مراكشية
دليلة حياوي
الجزء 9
هو:
* ما كليت من البارح والملحون في مقطع مسرحيتك زاد سد لي الشهية وفتح عينيا
– نمسحو؟
* تنقش في الروح
– شوف راه ما كاين لا حب لابضاض.. غير جاب ليك الله.. حالة انفعالية ما حاسبش للتوابع ديالها حساب.. بغيتي تعطي لنسيبتك درس بيا أنا حيث الوحيدة اللي قادرة تناقش معها.. باش ما نقول توقفها عند حدها!
هو:
* تنرتاح ليك ا نتي.. وانتي تترتاحي ليا
هي:
– عادي! جمعتنا شبه أخوّة من الطفولة حتى للكبر!
* مستعد نحارب باش تكوني معايا في ما تبقى من العمروالمراحل ما بين الطفولة والكبرما نعتبرهاش من حياتي
– قالوها أسيادنا اللوالة: أوّلنا صغاروآخرنا صغار!.. غادي تخليني نعاود النظرفي الصداقة ما بين الأطفال!
* جاوبي بصراحة في حياتك شي احد؟ الحريق في قصايد مسرحيتك شعلوشي واحد ياك؟
– ياك ما قاليك أناحجر؟
* شكوناهو؟
– وانت مالك؟
هو بعصبية:
* قلتليك شكوناهو؟
هي:
– قلتليك وانت مالك؟شحال من مرة خصني نكررها
* شكونااااااهو؟
– علاش؟
هو:
* بغيت نعرفو!
* نهذرمعاه!
* موحال تيبغيك!!
* واش أوروبي ولاغيرمجنّس؟
هي:
– وانت مالك؟
* أكيد ماشي ألماني!
– تكوي وتْبُخ وتعيط الشافي مولاي يعقوب!
* قصايد المسرحية بالعربية باينة للاعمى!
– العربية لغة مقررة في الجامعات الأوروبية من القرن 16 الميلادي!
* ماعندكش مع الأوروبيين ولا الآسيوين! ولاحتى المشارقة!.. حافظك صم!
– على وجه البسيطة كاين حتى الميريكان والأفارقة والأوستراليين؟
هو بيقين:
* جنّك مغربي!
– شايا لله آسيدي شمهروش!
* لاسيدي حمو مول الأحمرولالة ميرة مولات الأصفربحالي! هاذ خينا مراكشي وماشي معك في نفس المدينة!
– الكارتة عندك مضموسة قبل ما تفتح الطبيقة؟ها قلبي! ها تخمامي!
* ومراكش باش ياتيك الله لكن معايا أنا!
هي:
– أكيد بعدعمر طويل أوقصيروزارةالجالية غادي ترجع جثماني لمراكش حق مكفول للمغتربين وذيك الساعة صلي عليا صلاة الجنازة وفرّق الخبز والشريحة وكل جمعة رش لي القبر بماء ورد وحط عليه مشموم د الحبق! ولا نقوليك غرسو وتهنّى.. النقلات د الحبق راه في جامع الفنا قدام موالين العصير!
* مشّي! هاذ بوراس ما تيبغيكش كاين شي مفللللللس يخليك؟
بعصبية:
– باركا حدك تما!
* جاتك عليه النفس؟
– ادخل سوق راسك؟
* يااااااياخذك يا يتسا خراللّور! ولايحيّد گاع من الصف!
– واش شايفني سلعة؟
* جوهرة ثمينة! آويلي على سعدي وتعطات للدجاج!
– نسر الله يرحم الوالدين!
بتحدٍّ:
* زرزور! ولا يمكن جاوْجْ! راس مالو هذرة!
محتجة:
– زدت فيه صراحة
هوبحدة:
* قلت ليك ضارباك عليه النفس! ما كنتش عارف واش الحب أعمى حتى بالنسبة لموالين النظاظر بحالك!
– غادي نتخاصم معك
* ونجيب ليك غطاء سيدي بلعباس
– وااااا باركا صبري بدا يتقاضى
* معلوم يتقاضى.. لوكان نسربصح كون غطّاك بجناوحو.. في عشّو حتى واحد ما يسوگرفيك الشوفة كيف ما غادي نديرأنا..هذا إذ اكان فرضاً نسر..لكن تلقا يه فْنيان وأنا رآكي عارفاني شيهان!
هي ناشدة:
– يوم الحرب مشتهر..
قُدّام الفرسان
هو مستفسرا:
* قصيدة ناكرالحسان!.. ياك؟
هي:
ـ تماما! أحمق وحاظي حوايجو!!
هو:
* انتي إن شاء الله حوايجي ولباسي! كيف ما جاء في القرآن!
هي:
ـ علاش ماتقلبها هاذ الليلة ملحون ا لله يرضي عليك ونديرو مسابقة كيف زمان في حرب القصايد واللي خسر يخلص الزريعة سخونة!
* لواه الطحال عند بجگني في طريق الدار البيضاء!.. عمرك ماكنتي خوافة!
– الملحون ولّى بوعّو؟
بيقين:
* تتهربي
– مالي ورايا الذياب؟
* السبوعة ديال الأطلس! يالله!
– دبا انت في تاغزوت كاينين غيرالقرود! يالله
* ولفاعي تارودانت! يالله!
– وانا رودانية الأصل! يالله!
* وانا سرغيني شريف إدريسي سرى أجدادي بالليل للمغرب ولقاو الغِنى: أجمل النساء بأطيب تربة وهانا جاي بالطونوبيل ساري باش نغني روحي بجوهرة أمازيغية لاتقدر بثمن..انا الليعارف قيمتك رآك كبرتي قدامي ومعايا
– بغيت تطبّق: الجارأولى بالشفعة؟
* بغيت نجي نهذر مع هذاك النسرالفَنْيان ديالك.. إلاكان تيبغيك بصح.. يهز ولايكْحاز!
(يتبع)

عن الكاتب

عدد المقالات : 877

اكتب تعليق

الصعود لأعلى