كبرا وكبرت اهتماماتهما الحياتية بتفاصيلها وحيثياتها.. وتباينت أيضا المسافات الجغرافية بينهما.. لكن ظل ما يجمعهما حاضرا وبقوة.. حب المدينة الزاخرة بالتراث والتاريخ بروح طفولية تأبى أن تكبر..
إنها حكاية طبيب وفنانة مسرحية..
تكشبيلة مراكشية
دليلة حياوي
الجزء 5
قلت لها: فلوس اللبن يديهم زعطوط! خلاتو ممدود ومشات تعزي فمحمود! عندنا اليتامى والهجالات حتى في ميسور ومجالس الذكر كاينة حتى في أوطاط الحاج!..
وهيا تسول اللي حداها: هاذ البلايص اللي قالت حدا تركيا؟.. قالت ليها: لا.. تاونات آالحاجة!
اعتلت سحنته ملامح ذعر وكتب بحروف متداخلة:
* الله أكبر! فقّرتيها.. بغيت نقول قفّرتيها يا الصگعة انتي وهاذيك اللي قالت تانوات.. زعما تاونات! وسكتت ليكم؟
– وااايلي على سكتات! هي ما عرفتيهاش؟؟
هو:
* قولي لي.. هزّت جلّابتها وخرجت عريانة في الحومة وخلاص! جررر يا من تجررررر! اطلب يا من تطلب! والو!
– وااااااييييه… لبست فردة شربيل وحدة والثانية تحت باطها وتتضرب في باب الطونوبيل د مراتك وتغوّت: حلّي الباب آذيك المْنونْخة وجرررررري ترّيكتك لهنا؟!.. قبل ما يتبعوني من دار العزاء! ويفايْلوا عليا بالتابعة ديال الموت!
* راه ممنوع نذكرو تاونات! خصنا نقولو فاس! فااااااس منين جابت أمها لالة إيطو التاويل لمراكش! فراسك في داري ولّات عندي مدرسة: قُل ولا تقُل! فراسك ممنوع نقول باقي: قطبان الكفتة، ولا الكفتة مشوية؟!.. خصني نقول: شيش طاووق! وكيباب! ماشي حتى الكباب! وحلوى الميلود ديال العبار عرفتيها؟
– هذيك اللي تتباع في مولاي ادريس د فاس؟
* ها العار لا تذكري لي فاس.. خليك في مول القصور الولي السادس د مراكش عافاك.. الغزواني مول القصور!
– هههههه مال هاذ الحلوى الملونة اللي تتباع في سبع تْلاوي قبل ما توصل لمول القصور؟
* وخا آGPS د المدينة القديمة.. هذيك الحلوى آلالة بزّز مني خصني نسميها: علاجفرحة! بحال كيف تيسميوها في تركيا!
– ههههههههههههه! أحسن من علاج قرحة!
* طمْري معايا!
– ها واحد السكتة!
* مزيان باش نزرب عليك ونخوي المْزيوْدة!
هي بقلق بادٍ:
– آرسول الله!
* اللهم صَلِّي عليك آحبيب الله.. ما عرفت واش صاحبتك فعلا كانت الحب ديالي.؟.. ولا كنت تنجي خصيصا من خارج السور للإعدادية والثانوية عندها غير باش نكون قريب منك انتي!
باستغراب لا يخلو من استهجان:
– مني أنا؟ الله يعطيك الذل! ياك تربينا مجموعين؟
* تربية عوجة تفرض قيود على العائلات. من بعد عُمر معين اللعب تيولّي في السطاح ممنوع. قراية القصص والمجلات ومناقشتها في السطوان ممنوعة. وحتى من يسافرو بينا مجموعين تيبداو يفرقونا في السيارات والقطارات. عقلتي شحال من مرة الكوكوت ديالنا تحطات حدا الطجين ديالكم في النزاهات؟
– وزربيتنا تنشرات حدا بنشگرة ديالكم؟ هههههه
* ومقراجنا تغسل مع صينيتكم في السواقي والعزبان؟ لكن احنا كنا نعومو مفررررقين. نتنزهو مفرررررقين. نلعبو مفرررررقين. ناكلو مفرررررقين! وفوق راسنا العينين عاسّة!
– واش فيك السخانة؟
* السخانة شدتني منين قبلو داركم خطبة راجلك!
باحتجاج:
– السابق عافاك!
* عرفتي اش قالت الواليدة ذيك الساعة؟
– آهياا السلامة! حتى الواليدة دخلتيها في هاذ شرشمة المسقية بالعصيدة واللبن؟
* عمري ما نسيت ولا حتى خويا رضا غادي ينسى!
– ويل الشيطان يغرق فيه ما يبان! حتى رضا ما خلتيه في التيقار!
* سكتي شوية!
– مالي شادة الميكرفون وتنَرْهَن في العروسة؟
* ولّى بالك غير مع الركيز والغرامة!؟
– البركة في إعلام المغرب الجديد.. لكن فرضاً فرضاً بالي مع الغرامة عندك شي مانع ؟!
* المانع ما لقاتوش الواليدة مسكينة باش تحبس كارثة زواجك!
– عاود زواجي! لكن عندك نيت الحق.. كان فعلا كارثة.. طوفان مشاكل وزلزال بتوابع مدى العُمر..
* كانت الواليدة في هذاك النهار الكْحَل الزّحَل.. تتدور بين احواض الدار وتضرب الخماسي في السداسي وتقول: خسارة يا ولادي باقيين كيف بركوكش دايرين بيا. هذيك النقلة طيّبة تمنّيت نزرعها في دار واحد فيكم.
– تزرعني! واش أنا علفة ديال التمر؟
* ممكن تخليني نكمل بلا مشخرة؟
– اطلبني ورغبني!
* ها العار آلالة مولاتي!
– تفضل آسيدهوم لكن بالعقل!
فأجاب وهو يأخذ نفسا عميقا:
* بالعقل! بالعقل مع صاحبتك الحياة مستحيلة. وماشي انتي السبب.. لأنه لو كنتي انتي كون…
قاطعته بسرعة :
– كون اشنو؟
* كون تفرقت معها أول ما تفرقتي انتي مع راجلك!
(يتبع)